weather -3° Маладзечна
weather -3° Вілейка
weather 4° Смаргонь
weather -3° Ашмяны
weather 1° Валожын
weather -3° Мядзел
weather 4° Астравец
Падпіска
на друкаванае выданне
1 еўра 2.417
1 долар 2.112
100 рас.руб. 3.2096
11.08.2013 08:03 ,

Прыгожыя кветкі на балконах у Маладзечне – хто даглядае

Яшчэ 27 мая рабочыя з дапамогай спецыяльнай тэхнікі вешалі вазоны на балконах дамоў па Вялікім Гасцінцы, каля гімназіі №6.

Намесніца дырэктара “Камунальніка” Зінаіда Рудніцкая расказала, што вясной для гэтага ЖРЭУ-2 выдалі 400 кашпо.

У Інтэрнэце нават з’явіўся фотарэпартаж, як на дамы чапляюць вазоны, а пад ім – каментары занепакоеных чытачоў:

– У адрозненне ад спадарожнікавых талерак і кандыцыянераў, гэтыя гаршкі з кветкамі бяспечныя? Дзе прыёмная камісія? (Яе не бачна на фотаздымках).

– Сапраўды пасля “Дажынак” Маладзечна стала прыгожым горадам. Вось толькі цікава, як жыхары даглядаюць гэтыя расліны?

Ці паліваюць кветкі жыхары дамоў?

Калі вазоны пакуль яшчэ з дамоў не зваліліся, то хваляванні наконт таго, ці будуць людзі паліваць кветкі, былі незнарок. Па Вялікім Гасцінцы ў адным і тым жа доме на балконах можна ўбачыць і квітнеючыя кветкі, і чэзлыя.

Некаторыя жыхары, з якімі нам удалося паразмаўляць, скардзяцца на туманы, якія псуюць кветкі. Аднак туман туманам, а кветкі на балконах, што побач, ёсць добра дагледжаныя і зусім не дагледжаныя. Магчыма, некаторым гаспадарам яны проста непатрэбныя, бо гэта дадатковая праца.

– Нам даводзіцца выліваць кожны дзень па два вядры вады, каб кветкі не сохлі, – кажа гаспадар адной з кватэр дома №64. – Раніцай адно вядро, а ўвечары другое.

Безумоўна, ёсць і руплівыя жыхары, якія паспяваюць даглядаць не толькі кветкі на балконе, але і вакол дома. Каля пад’ездаў высаджваюць аксаміткі, вяргіні.

Ёсць жыхары, якім бы і хацелася ўпрыгожыць двор, ды сіл ужо не стае:

– Калі была маладая, то садзіла кветкі, – кажа пажылая жанчына з дома №63, – а зараз ужо сілы не тыя, таму каля пад’езда расце трава. Маглі б маладыя гэтай справай заняцца, бо гэта ж і іх дом. На прыгожае заўсёды прыемна глядзець.

Галіна СІНІЦА.

Фота flowers.cveti-sadi.ru

Абмеркаваць
comments powered by HyperComments
Новае на сайце